10 معلومات عن البلاستيك

10 حاجات عن البلاستيك:

1. اكتر تلوث موجود فى المحيط و بيدمر العالم و مبهدل الحيوانات فى المحيط هو تلوث البلاستيك هتلاقى صور كتير لطيور بتغلط و تبلع بلاستيك و تموت بسببها و سمك طبيعي برضه بيتلغبط الحيتان بتبلع الكميات بالهبل عشان هما مبيشوفوش و هما بياكلو بانهم بيفلترو المايه و بالتالى بياخدو كميات بلاستيك بالغلط كده.
2. العادي ان البحر بيحلل اي حاجة فيه و كل حاجة بتدوب فيه يعني, ده بيحصل مع البلاستيك بس المشكله ان البلاستيك بياخد وقت وقت طويل عشان يتحلل و على ما بيتحلل بيخلي الاجزاء بتاعته موجودة و ياكلها السمك الصغير و بعدين يبلعه السمك الوسط شوية و بعدين نصطاد احنا الوسط ده و ناكله فطبيعي يكون اكلنا بلاستيك و ده بيضر الصحة و بيجيب امراض طبعا عشان البلاستيك بيتصنع من مشتقات بترول.
3. فيه 12 نوع بيعتبرو ضمن تلوث البلاستيك و ليهم نفس الاثر بس بتدرجات مختلفة (فى الاخر كلهم بيدمروا البيئة يعني) منهم:
• الفوم اللى هو الاطباق الفوم و الفل الصغير ده.
• اعقاب السجاير.
• الازايز البلاستيك.
• ااستريتش اللي بنغلف بيه الاكل.
• غطيان الازايز.
• مشتقات الورق.
• اكياس البلاستيك.
• اي انواع لف بيستخدم البلاستيك.
• الشفاطات (روايات اخر الشاليموه).
• مصنعات الفوم (الكور الصغيرة بتاعت الهدايا و الكور اللى بيتكون بتلف الكهربائيات و تتفرك للعب).
• الكانزات.
• الحبال.
4. احنا هنفضل نستخدم البلاستيك لانه الحل الافضل و الاسهل و الارخص و عشان احنا انانين اصلا و مقتنعين ان الكوكب بتاعنا لوحدنا فكل واحد مؤمن انه عادي يرمي و مجتش على زبالته لان من الشاليموه بتاعته هي اللي هتلوث المحيط و تقتل السمكة و تموت القرش و تبوظ السلسة الغذائية.
5. فيه حلول و كلام كتير و كل شوية هيطلع فكرة حلوة عشان تقول يا جماعه احنا هنصنع مادة جديده تتحلل غير البلاستيك و برضه تطلع مصانع و تستخدم مواد صناعية و يتعمل دراسات و نلاقى ان هوب هوب ايه ده برضه المواد ديه سبحان الله بتبوظ البيئة.
6. يمكن كل التفكير اللى ممكن يحسن دايرة التلوث هو اننا نتحول لاشخاص minimalists و طبعا حاجة زي ديه بتكون صعبة عشان احنا شايفين انك لو بقيت شخص موفر فانت بخيل و مش غني و بتستخسر فى نفسك و ليه تعمل فى نفسك كده و ليه تستغنى عن فكر النيش فى حياتك و الناس هتقول ايه؟ بس حقيقي احنا هنتحاسب على ميزان البيئة اللى ربنا عامله و احنا بنخربه و بنشرده.
7. هتلاقى دلوقتي اقسام جديدة فى هندسة تحت مسمى Green احنا بنعمل اي صناعة بس الصناعة ديه هتبقى خضرا يا جماعه عشان العالم بيطور و احنا لازم نصنع بس هنصنع عربيات عادي جدا جديدة تبقى خضرا عشان تمشى بالكهربا و كلنا نتجه للفكرة ديه و هنرمي عربياتنا القديمة فين يا ناس هتروح المحيط و المعدن بتاعها و الالومنيوم اللى فيها هيبقى ضمن ال dirty plastic dozen و لفى بينا يا دنيا تاني, طيب ليه!!
8. يمكن حلول واقعية زي انك تحسب كل يوم استخداماتك و تعد ده و تشوف لو ليه استخدام تانية و تحاول تستخدم حلول بيئية نوعا ما هتساعدك يعني شوية.
9. فيه افلام كتير اتكلمت عن ده (وثائقية طبعا) زي:
• Home
• Plastic ocean
• Island of flowers
• Before the flood
• Racing extinction
• Planet ocean
10. مشكله البلاستيك بتكمن فى تجميعة صور زي ديه انت فى الاخر بتلاقى كائنات تانية بتتاثر و الكائنات ديه بتخلف على اوقات و مواسم طويلة و ما بتلحقش تعادل عددها و تخلف كتير و بالتالى عادي ممكن تنقرض.

Final word:

اكتر مشهد بشوفه بيكون اننا هنعوم فى بلاستيكات و اخشابنا و شوية مايه طبعا مش بالضرورى احنا اللى هو احنا يعني ممكن يكون عيالنا و ده عادي برضه بسبب اننا معندناش اي احساس بالمسئوليات تجاه البيئة و كده يعني. فى كل الحالات ديه احنا بنروح لمناطق وحشة و اننا هنخسر كل المناظر الحلوة عشان شوية حاجات مادية بيتضحك علينا بتسويقها انها مهمة و لازم نجيبها عشان مش هنقدر نعيش من غيرها بعدين.